Kryeministri Edi Rama, gjatë fjalës së tij në mbledhjen e grupit parlamentar të Partisë Socialiste të mbajtur këtë të shtunë, ka ironizuar propozimin e ish-ministres së Jashtme, Elisa Spiropali, për një "marrëveshje të re për Shqipërinë". Ky reagim vjen pas qëndrimit të mbajtur nga Spiropali në rrjetet sociale, pak ditë pas nisjes së protestave kundër projektit të zhvillimit në Zvërnec.
Rama i cilësoi mbështetësit e kësaj nisme si "shpirtra të humbur" brenda partisë, duke deklaruar se pret me interes dorëzimin e një drafti konkret, por shprehu dyshime për realizimin e tij. "Mezi pres që të na e sjellin draftin e Shqipërisë së re të shkruar. Por kam frikë se nuk do vijë kurrë", u shpreh kryeministri.
Nga ana tjetër, Elisa Spiropali kishte argumentuar nevojën për një pakt të qëndrueshëm, duke theksuar se institucioni i parlamentit duhet të forcojë funksionet e tij përfaqësuese, kontrolluese dhe monitoruese. Ajo vuri në dukje se demokracia dobësohet kur pushteti rritet më shpejt se mekanizmat e kontrollit mbi të, duke shtuar se parlamenti nuk duhet të jetë thjesht vendi ku miratohen vendimet, por hapësira ku dëgjohet shoqëria.