Kryeministri Edi Rama ka mbështetur qëndrimin kundër përdorimit të së drejtës së vetos brenda Bashkimit Europian, duke e cilësuar atë si një mjet të papërshtatshëm për realitetin e tanishëm. Sipas Ramës, ky mekanizëm nuk i shërben as unionit dhe as shteteve anëtare. Gjatë konferencës së përbashkët për shtyp, kryeministri kujtoi se Shqipëria ka qenë shpesh viktimë e kësaj të drejte, e cila ka penguar procesin e integrimit të vendit.
Sipas kreut të qeverisë, heqja apo kufizimi i vetos nuk duhet të shihet si dobësim i pozitës së një vendi, por si një hap drejt transformimit të nevojshëm të Bashkimit Europian. Ai nënvizoi se Shqipërisë nuk i duhet vetoja për të bërë të fortin në tryezën e vendimmarrjes, por e sheh anëtarësimin si një mundësi për të qenë pjesë e një familjeje ku vendet trajtohen si të barabarta.
Lidhur me procesin e ardhshëm të zgjerimit, Rama njoftoi se do të vijohet puna për hartimin e traktateve të anëtarësimit. Ai theksoi se këto dokumente do të përfshijnë masa sigurie për të garantuar që angazhimet e ndërmarra gjatë procesit të integrimit të vazhdojnë të mbeten në fuqi edhe pas marrjes së statusit të shtetit anëtar. Kryeministri theksoi se kjo qasje ndaj integrimit është një shenjë progresi për vendin dhe se Shqipëria ndodhet aktualisht në rrugën e duhur drejt bashkimit me unionin.