Kryeministri Edi Rama po përfaqëson Shqipërinë në Konferencën për Rindërtimin e Ukrainës (URC 2026), e cila po zhvillohet në Gdańsk të Polonisë në datat 25 dhe 26 qershor. Veprimtaria ka bashkuar krerë shtetesh, përfaqësues të institucioneve financiare ndërkombëtare, si dhe aktorë të biznesit dhe shoqërisë civile për të koordinuar mbështetjen për rimëkëmbjen e Ukrainës.
Fokusi kryesor i diskutimeve është mobilizimi i investimeve për zhvillimin afatgjatë të vendit, me theks te sektorët e dëmtuar nga agresioni rus: energjia, infrastruktura kritike dhe logjistika. Gjithashtu, konferenca i kushton vëmendje forcimit të kapaciteteve të sigurisë dhe mbrojtjes, elemente që vlerësohen si thelbësore për suksesin e procesit të rindërtimit.
Sipas agjendës zyrtare, Kryeministri Rama do të pritet nga kryeministri i Polonisë, Donald Tusk, dhe do të marrë pjesë në ceremoninë zyrtare të hapjes. Kreu i qeverisë shqiptare do të mbajë një fjalë përshëndetëse në sesionin e dytë plenar. Përveç takimeve me homologë të vendeve pjesëmarrëse, kryeministri do të zhvillojë një takim edhe me Komisioneren e Bashkimit Evropian për Zgjerimin, Marta Kos, mbi procesin e integrimit dhe bashkëpunimin ekonomik. Vizita përfshin gjithashtu takime me drejtues të kompanive të mëdha ndërkombëtare, veçanërisht nga sektori i energjisë, për të eksploruar mundësi të reja zhvillimi.
Përditësime
Në Konferencën për Rindërtimin e Ukrainës në Poloni, Kryeministri Edi Rama theksoi se rindërtimi i vendit është një domosdoshmëri strategjike, jo një akt bamirësie, dhe kërkoi nisjen e procesit përpara përfundimit të luftës. Rama vlerësoi se ndërlidhja e rindërtimit të Ukrainës me integrimin e Ballkanit Perëndimor shërben si mekanizëm përforcues për stabilitetin evropian. Gjatë vizitës, Kryeministri zhvilloi një takim dypalësh me homologun polak Donald Tusk.