Kryeministri Edi Rama ka ndarë mëngjesin e së dielës një mesazh në rrjetin social Facebook, të shoqëruar me një videokartolinë nga mbledhja e zgjeruar mujore e qeverisë dhe Grupit Parlamentar të Partisë Socialiste.
Në takim u zhvillua një dëgjesë institucionale me drejtoreshën e Agjencisë Shtetërore të Kadastrës për ecurinë e reformës në kadastër, një proces kyç për administrimin e pronave.
Gjithashtu u bashkëbisedua me kryetarin e Komisionit të Reformës Administrative Territoriale mbi skenarët e mundshëm të reformës.
Mbledhja përfshiu diskutime për kalendarin kombëtar të aktiviteteve dhe përmbajtjen e takimeve "Punët e Shqipërisë", që synojnë angazhimin më të gjerë publik.
Në postim, Rama shkruan: «Mirëmëngjes dhe me videokartolinën e mbledhjes së zgjeruar mujore të qeverisë dhe Grupit Parlamentar Socialist, ku u krye një dëgjesë institucionale me Drejtoren e ASHK për ecurinë e reformës në kadastër; u bashkëbisedua me kryetarin e Komisionit të Reformës Administrative Territoriale për skenarët e reformës, si edhe u diskutua kalendari kombëtar dhe përmbajtja e takimeve "Punët e Shqipërisë", ju uroj të diel të qetë».