Edi Rama, kryeministër i Shqipërisë, ka ndarë në llogarinë e tij në rrjetet sociale një fragment të shkëputur nga fjala e fundit e Hashim Thaçit, ish-president i Kosovës, e mbajtur këtë të mërkurë në Gjykatën Speciale të Hagës.
Bashkëlidhur fragmentit, Rama shkroi: “Liria ka një emër”.
Në fjalimin e tij, Thaçi uroi qytetarët e Kosovës për 18-vjetorin e Pavarësisë, të shënuar dje: “Dëshiroj që sot nga kosa sallë t’u përcjell urimet më të përzemërta, të gjithë qytetarëve të Republikës së Kosovës për këtë festë madhështore”. Ai deklaroi: “Është vetëm një e vërtetë, që akuzat nuk qëndrojnë. Unë jam plotësisht i pafajshëm”, duke shprehur se bashkënden me të gjitha viktimat në Kosovë, pavarësisht përkatësisë etnike.
Thaçi shpjegoi kontekstin e luftës: “Është e rëndë të dëgjosh këtë akuzë, veçanërisht kur gjatë luftës nuk e dija nëse do të isha gjallë prej orës në orë dhe ditës në ditë. Nuk isha i sigurt nëse do ta shihja familjen time, lëre më të ëndërroja të ushtroja kontroll në Kosovën e pushtuar për rreth 90 vite”. Ai shtoi se nuk mund të qëndronte indiferent ndaj shfarosjes së popullit të tij dhe se është krenar për rolin e tij: “Është ofendim për kujtimin e mijëra heronjve që dhanë jetën për lirinë, është ofendim për dhjetëra mijëra viktimave të vrarë gjatë masakrave”.
Seanca u mbajt ndaj ish-krerëve të Ushtrisë Çlirimtare të Kosovës (UÇK): Hashim Thaçi, Kadri Veseli, Rexhep Selimi dhe Jakup Krasniqi. Katër themeluesit e UÇK-së mbajtën dëshminë e tyre të fundit para trupës gjykuese. Vendimi do të jepet pas 90 ditësh.