Kryeministri Edi Rama zhvilloi një takim me banorët e Thethit për të diskutuar mbi mundësitë që ofron Paketa e Maleve. Gjatë bisedës, kreu i qeverisë iu drejtua një banori, ndërtimi i të cilit u prish vitin e kaluar për shkak të mungesës së lejes, duke përdorur shprehjen "koka bën, koka pëson".
Banori, i cili jeton në Angli dhe është përfitues i paketës së re, shprehu optimizëm për mundësinë e zhvillimit të sipërmarrjeve në mënyrë ligjore në vendlindje. Kryeministri Rama deklaroi se mbështetja institucionale do të vijojë, por paralajmëroi se zhvillimi i pakontrolluar përbën kërcënim për imazhin e zonës.
Sipas kreut të qeverisë, ruajtja e natyrës është thelbësore për tërheqjen e vizitorëve. Ai solli si shembull modelin e Korsikës, ku rregullat për ndërtimin janë strikte dhe fokusi qëndron te shitja e destinacionit në tërësi, e jo thjesht te strukturat individuale.
"Ju jeni të bekuar që keni fatin të jeni trashëgimtarë të kësaj zone. Magjia e këtyre maleve ju jep mundësinë ta nisni një sipërmarrje turistike sikur ta nisni një ndeshje me rezultatin 3-0", u shpreh Rama, duke bërë thirrje për solidaritet mes sipërmarrësve vendas.