Kryeministri Edi Rama ka reaguar ndaj akuzave të vazhdueshme të opozitës, duke deklaruar se pavarësisht sulmeve personale që prekin familjen, fëmijët dhe të vdekurit e familjes së tij, ai nuk ka ndërmend t'u përgjigjet me të njëjtën gjuhë. Gjatë ceremonisë së organizuar për 35-vjetorin e themelimit të Partisë Socialiste në Lezhë, kreu i qeverisë vlerësoi qëndrimin e socialistëve për të mos ndjekur "rrugët e hakmarrjes".
Sipas Ramës, qasja e mazhorancës bazohet në vlerat evropiane dhe refuzimin e përdorimit të mjeteve të ngjashme me kundërshtarët. "Nuk kanë lënë gjë pa thënë për familjen time, njerëzit e mi, fëmijët e mi, për të vdekurit në shtëpinë time, por kurrë nuk do dëgjoni që unë të flas për familjet e tyre", deklaroi kryeministri. Ai theksoi se pikërisht "njerëzillëku" është ajo që ndan Partinë Socialiste nga forcat e tjera politike.
Në të njëjtin takim, Rama bëri një përmbledhje të arritjeve të mazhorancës, duke argumentuar se qeverisja e tij ka ndryshuar rrënjësisht imazhin e vendit në arenën ndërkombëtare. Ai shtoi se, megjithëse mund të ketë gabime, raporti me interesin kombëtar dhe botën tregon se Shqipëria është shndërruar në një vend që respektohet, duke kaluar nga "delja e zezë" e një dekade më parë në një shtet që është më afër se kurrë realizimit të ëndrrës evropiane.