Kryeministri Edi Rama ka komentuar protestat që po zhvillohen prej 9 ditësh kundër projektit në Zvërnec, duke i cilësuar ato si një shfaqje të papritur të "ethes ambientaliste". Gjatë fjalës së tij në Shkodër, në kuadër të 35-vjetorit të Partisë Socialiste, kreu i qeverisë theksoi se mbështetësit e kësaj lëvizjeje po përdorin retorikë ekstreme për të marrë peng një shqetësim qytetar.
Rama ironizoi thirrjet e protestuesve për mbrojtjen e natyrës, duke i krahasuar ato me periudha të shkuara kur, sipas tij, kishte probleme të theksuara me gjuetinë ilegale dhe ligjin e importit të mbetjeve. "Ku ishin këta kur kërciste gjuetia ilegale dhe vriteshin specie të mbrojtura?", u shpreh ai, duke shtuar se qeveria e tij nuk është shkatërruese, por shpëtimtare e habitateve natyrore në vend.
Kreu i qeverisë pranoi se në protesta marrin pjesë edhe votues të Partisë Socialiste, por shprehu bindjen se ata po ndjekin një narrativë të gabuar. Sipas tij, protestuesit po ushqehen me thashetheme për plane djallëzore mbi "shitjen e Shqipërisë" apo shkatërrimin e zonave të mbrojtura përmes ndërtimeve masive. Rama theksoi se forca politike që ai drejton nuk e ka tradhtuar kurrë interesin kombëtar dhe refuzoi kategorikisht akuzat për tradhti ndaj interesave të vendit.
Përditësime
Nga Shkodra, kryeministri Edi Rama akuzoi opozitën për instrumentalizim të ndjenjave kombëtare, duke kritikuar përdorimin e kauzave patriotike për qëllime politike. Rama hodhi poshtë pretendimet se ulja e çmimeve të biletave të avionit synon nxitjen e emigracionit, ndërsa kritikoi retorikën e protestuesve ndaj qytetarëve nëpër kafene, duke nënvizuar se shumë prej tyre janë duke zhvilluar aktivitetin e tyre profesional.
Kryeministri Edi Rama ashpërsoi gjuhën ndaj protestuesve, duke i krahasuar thirrjet e tyre me retorikën e Gjermanisë naziste. Ai akuzoi aktorë të huaj për orkestrimin e këtyre lëvizjeve, me qëllim dëmtimin e aspiratave të Shqipërisë për t'u bërë pjesë e 'Ligës së Kampionëve të Turizmit'. Përballë këtyre zhvillimeve, Rama rikonfirmoi mandatin e qeverisë së tij, pas fitores në zgjedhjet e majit të kaluar. Në një zhvillim të ndarë, Shqipëria siguroi një sukses ndërkombëtar duke u zgjedhur unanimisht Presidente e Forest Europe për periudhën 2026–2030.