Nga Thethi i Shkodrës, kryeministri Edi Rama njoftoi se ndërtimi i rrugës së Dukagjinit do të nisë brenda dy javësh. Gjatë bashkëbisedimit me banorët, kreu i qeverisë sqaroi se vonesat kanë ardhur si pasojë e hartimit të projektit teknik dhe mundësive financiare.
Duke bërë një krahasim me treguesit ekonomikë të viteve të shkuara, Rama theksoi se vendi ka arritur një Prodhim të Përgjithshëm prej 27 miliardë eurosh, ndërsa synimi i qeverisë është arritja në 35 miliardë euro.
"E kemi nisur punën me më pak se 10 miliardë euro Prodhim të Përgjithshëm. Sot e kemi çuar në 27 miliardë, por duhet ta çojmë në 35 miliardë për të financuar më shumë projekte. Fondet vijnë nga investimet", u shpreh kryeministri.
Kreu i qeverisë mbrojti nevojën për thithjen e investimeve të huaja, duke i cilësuar ato si thelbësore për zhvillimin ekonomik dhe mundësinë për të financuar projekte të tjera infrastrukturore që ndodhen në pritje. Sipas tij, rritja e mundësive financiare është çelësi që do t'i hapë rrugë edhe investimeve të tjera në vend.