Edi Rama, kryeministër i Shqipërisë, deklaroi të hënën se do të nisë një ofensive ligjore për të penguar Prokurorinë dhe Gjykatën e Posaçme kundër Korrupsionit dhe Krimit të Organizuar të vendosin pezullimin nga detyra për ministrat e kabinetit të tij dhe zyrtarë të tjerë të lartë.
Deklaratat e tij erdhën si kundërpërgjigje ndaj vendimit të Gjykatës Kushtetuese, e cila la në fuqi pezullimin e Belinda Balluku-s, numrit 2 të qeverisë, duke rrëzuar pretendimin e Ramës se kjo përbënte cënim të kompetencave kryeministrore.
Në platformën X, Rama shkroi: “Funksionet e padelegueshme kushtetuese, nga ai i anëtarit të qeverisë tek ai i Presidentit të Republikës dhe jo vetëm, nuk mund të pezullohen kurrësesi nga askush duke u nisur nga një emër i përveçëm, sepse pezullimi paralizon funksionin, pra institucionin që ai/ajo drejton”. Ai e arsyetoi këtë me nevojën për të garantuar pavarësinë e pushteteve legjislative dhe ekzekutive.
Opozita e lexoi këtë si presion ndaj drejtësisë. Gazment Bardhi, kryetari i grupit parlamentar të Partisë Demokratike, deklaroi se bëhet fjalë për “presion të organizuar kundër drejtësisë”. Ai shtoi: “Kur Qeveria dhe Kuvendi bashkohen për të goditur vendimin e dy gjykatave në lidhje me një hetim penal aktiv, kemi dy pushtete që përpiqen të ndikojnë të tretin. Kjo nuk është ndarje pushtetesh”.
Organizatat e shoqërisë civile e shohin si moment kritik për pavarësinë e drejtësisë dhe kthim pas nga lufta kundër korrupsionit. Ato theksojnë se një ndryshim i tillë do të japë imunitet shtesë ministrave dhe funksionarëve, duke rrezikuar integrimin europian. Deklarata e tyre thotë: “Qëndrimi i kryeministrit është një akt kundër retorikës antikorrupsion dhe standardeve që duhet të plotësojë Shqipëria për të arritur objektivin e anëtarësimit”.