Kryeministri i Shqipërisë, Edi Rama, gjatë një interviste për Deutsche Welle në Gjermani, u përgjigj në lidhje me protestat njëmujore në Tiranë dhe zhvillimet e mëdha ekonomike në vend. I pyetur për projektet turistike, të lidhura shpesh me investitorë si Jared Kushner, Rama i cilësoi ato si transformuese për vendin, duke theksuar se objektivi i qeverisë është thithja e investimeve të huaja direkte dhe anëtarësimi në Bashkimin Evropian.
Lidhur me shqetësimet për mungesën e konsultimit publik dhe mbikëqyrjes demokratike ndaj këtyre investimeve, kryeministri mohoi ekzistencën e një krize besimi. Sipas tij, hapësira publike në bulevard është dëshmi e demokracisë në veprim, ku qytetarët gëzojnë lirinë për të shprehur pikëpamjet e tyre. Ai rikujtoi se vendi ka bërë përparim të ndjeshëm, duke theksuar se në të njëjtin bulevard, gjatë jetës politike shqiptare, janë vrarë njerëz duke protestuar, ndërsa sot ai shërben si një shembull i lirisë.
Sa i përket përdorimit të Inteligjencës Artificiale, Rama vlerësoi se ajo do të ndihmojë në informimin dhe këshillimin e institucioneve, ndonëse nuk pranoi një lidhje të drejtpërdrejtë të saj me monitorimin financiar të investimeve. Ai konfirmoi se partia e tij ka marrë një mandat nga 868 mijë votues, ndaj çdo ndryshim qeverisës duhet të vijë vetëm përmes zgjedhjeve të ardhshme. Në lidhje me ndryshimet ligjore në mjedis, kryeministri siguroi se standardet do të jenë në përputhje me legjislacionin evropian gjatë procesit të negociatave.