Kryeministri i Shqipërisë, Edi Rama, ka reaguar lidhur me kundërshtimet ndaj projektit zhvillimor në Zvërnec. Në një intervistë për televizionin francez France 24, ai vlerësoi se protestat nuk janë vetëm rrjedhojë e shqetësimeve të brendshme, por edhe pasojë e ndërhyrjeve nga aktorë të huaj.
Sipas Rama, pas përpjekjeve për të bllokuar këtë investim qëndrojnë interesa që kundërshtojnë zhvillimin e vendit. Ai theksoi se Irani, me të cilin Shqipëria është në një luftë kibernetike prej tri vitesh, dhe konkurrentë rajonalë po ndikojnë në proceset që po zhvillohen.
"Ka shumë ndërhyrje, qoftë nga Irani apo konkurrentë në rajon që nuk e duan këtë zhvillim në Shqipëri. Ka edhe shqetësime të një pjese të popullsisë që dëshiron gjëra të tjera, por ne jemi zgjedhur për të bërë atë që kemi premtuar dhe mes premtimeve është edhe ky projekt", deklaroi kryeministri.
Duke iu referuar natyrës së këtyre protestave, Rama vuri në dukje një mospërputhje gjeografike në qëndrime. Ai nënvizoi se protestat po zhvillohen kryesisht në Tiranë, ndërsa në Vlorë, ku është parashikuar realizimi i investimit, qytetarët e mbështesin projektin. Kreu i qeverisë rikonfirmoi vendosmërinë për të vijuar me zbatimin e planit.
Ky qëndrim përputhet me deklaratat e bëra një ditë më parë nga Rama në një intervistë për gazetën Financial Times, ku ai shprehu bindjen se planet për modernizimin e bregdetit do të ecin përpara, pavarësisht kundërshtimeve.