Kryeministri Edi Rama zhvilloi këtë të mërkurë një konferencë për shtyp në Tiranë me presidenten e Komisionit Evropian, Ursula von der Leyen, ku u diskutua për ecurinë e procesit të integrimit evropian dhe zhvillimet e fundit lidhur me ish-drejtoreshën e Shërbimit Informativ Shtetëror, Vlora Hyseni.
Sipas kryeministrit, debatet publike dhe masat e ndërmarra ndaj Hysenit nuk ndikojnë në perceptimin e partnerëve ndërkombëtarë për vendin. Ai u shpreh se institucionet evropiane i shohin këto zhvillime si progres në kuadër të reformave dhe luftës kundër korrupsionit. Rama kritikoi shpërndarjen sporadike të materialeve hetimore në media, duke i cilësuar ato si përpjekje për të krijuar konfuzion në opinionin publik. Ai theksoi se çështja duhet të mbetet në dorën e prokurorisë dhe gjykatës, të cilat do të vlerësojnë nëse ka pasur shkelje të sigurisë kombëtare.
Lidhur me situatën e SHISH, kryeministri deklaroi se metoda e përdorur në këtë rast është e paparë dhe se partnerët ndërkombëtarë të sigurisë nuk kanë shprehur shqetësim për materialet e bëra publike. Rama vlerësoi se qeveria është e përkushtuar në procesin e mbylljes së kapitujve të negociatave për anëtarësimin në Bashkimin Evropian, duke theksuar se sistemet demokratike të Shqipërisë po zhvillojnë aftësi vetëkorrigjuese.