Kryeministri Edi Rama ka reaguar lidhur me protestat që po zhvillohen prej më shumë se 40 ditësh në Tiranë, në lidhje me projektin turistik në Zvërnec. Gjatë një prononcimi nga Jala, kreu i qeverisë shqiptare nënvizoi se asnjë projekt nuk mund të realizohet pa standardet e Bashkimit Europian.
Sipas Ramës, kritikat ndaj një projekti që nuk ka përfunduar ende janë të pajustifikuara. Ai bëri një dallim të qartë midis Komisionit Europian dhe grupit të eurodeputetëve që iu bashkuan protestuesve, duke deklaruar se këta të fundit kanë folur në mënyrë të pasaktë.
"Për këtë projekt janë mbledhur disa nga arkitektët më të mirë të botës. Të dalësh dhe të sulmosh një projekt që akoma nuk është bërë është inkuizicion. Ne nuk bëjmë dot një projekt që nuk e pranon BE-ja, ose duhet të themi që nuk futemi në BE", u shpreh kryeministri. Ai sqaroi se referenca e tij për Bashkimin Europian i referohet Komisionit Europian dhe jo qëndrimeve individuale të atyre që ai i quajti "3-4 të gjelbrat" që mbështetën tubimin.