Kryeministri Edi Rama mori pjesë në edicionin e tretë të Javës së Administratës Publike, ku vuri theksin te rëndësia e reformave të qëndrueshme përmes teknologjisë dhe inteligjencës artificiale. Rama deklaroi se procesi i digjitalizimit të Kadastrës, i mbështetur nga Bashkimi Evropian, ka përfunduar brenda afatit të përcaktuar.
Sipas kreut të qeverisë, digjitalizimi ka transformuar shërbimet publike, duke eliminuar pritjet fizike për qytetarët dhe duke e bërë administratën më të aksesueshme. Ai theksoi se sfida e radhës është ndërtimi i një sistemi që do ta bëjë shërbimin e kadastrës plotësisht online.
Në lidhje me menaxhimin e fondeve publike, kryeministri njoftoi se Shqipëria po bashkëpunon me kompani të mëdha teknologjike për të integruar inteligjencën artificiale në prokurimet publike. Ky projekt do të kalojë në fazën e testimit vitin e ardhshëm, ndërsa synohet të jetë plotësisht funksional në vitin 2028. Rama u shpreh se ky sistem do të eliminojë parregullsitë dhe do të rrisë integritetin në procedurat e tenderimit, duke marrë si shembull pozitiv ndryshimet në Maturën Shtetërore.