Kryeministri Edi Rama ka ndarë me ndjekësit në rrjetet sociale një video-mesazh nga zyra e tij, teksa në sfond dëgjohen qartë thirrjet e protestuesve që kërkojnë dorëheqjen e tij. Kreu i qeverisë u shpreh se ky kor e ekzalton dhe e ka bërë të reflektojë mbi zhvillimet e fundit.
Rama deklaroi se po përgatit fjalimin që do të mbajë në mbledhjen e përbashkët të kabinetit qeveritar dhe grupit parlamentar socialist, e cila është planifikuar të fillojë të premten në orën 09:30. Nga pamjet e shfaqura në ekranin e kompjuterit të tij, bie në sy një qasje ndaj pjesëmarrësve në protestë që kanë qenë votues apo anëtarë të Partisë Socialiste.
Kryeministri bëri dallimin ndërmjet asaj që e quajti "bulevardi i flamingove" dhe situatës aktuale, të cilën e përshkroi si "bulevardi i sorrave dhe korbave". Megjithatë, në draftin e tij, Rama thekson se qytetarët që janë në protestë nuk janë kundër Shqipërisë së ndërtuar gjatë tri mandateve të qeverisjes së tij.
Kjo dalje e kryeministrit vjen në një kohë kur në media janë shtuar aludimet për një riformatim të mundshëm të kabinetit qeveritar, si pasojë e presionit të protestës qytetare që vijon prej disa javësh.