Kryeministri Edi Rama zhvilloi sot një takim në kompleksin industrial të Durrësit, ku operojnë kompani në fushat e transportit, riciklimit dhe përpunimit industrial.
Gjatë takimit, ai shkëmbeu batuta me punonjësit e huaj, duke i porositur të mësojnë shqipen. “Nuk e di sa keni ecur me gjuhën shqipe, por duhet të mësoni shqip, sepse duhet të mësoni si të dashuroni dhe të mallkoni”, u shpreh Rama.
Kreu i qeverisë prezantoi një skemë të re pensionesh, që pasuron atë aktuale dhe nuk e zëvendëson. Kjo skemë u jep mundësi punëmarrësve që duan të kursejnë më shumë, të japin një kontribut nga paga, të cilin shteti e shoqëron me të njëjtën shumë. “Nëse dikush nxjerr nga paga një euro për pensionin, shteti vendos një euro tjetër. Kështu bëhen dy euro dhe kjo do të jetë e kombinuar”, tha Rama. Mekanizmi forcon fondin e pensioneve dhe lidhjen mes sektorit publik, privat dhe punëmarrësve.
Rama nënvizoi rritjen e nevojës për burime njerëzore të specializuara, në një kohë kur teknologjia zëvendëson punën e njeriut. “Robotët nuk do të arrijnë të plotësojnë të gjitha nevojat. Sot nuk është pyetja sa mund të paguaj, por sa je në gjendje të bësh punën që kam nevojë. Nuk është më koha që kompanitë të kursejnë te pagat, por te specialistët”, u shpreh ai. Për shembull, një kompani në kompleks ka 15 specialistë të kualifikuar, ndërsa i duhen rreth 40.
Përditësime
Kryeministri Edi Rama, në kompleksin industrial të Durrësit ku prezantoi skemën e re të pensionesh, deklaroi: "Shpesh shtrohet pyetja pse nuk ka ndërmarrje apo fabrika... për t’u punësuar".
Rama theksoi investimet në teknologji dhe aftësi profesionale si bazë për paga më të larta dhe vende pune cilësore, duke synuar drejtimin e ekonomisë drejt vlerës së shtuar, specializimit dhe mundësive për punonjësit. Ai nënvizoi nevojën për lidhje më të fortë mes arsimit profesional dhe industrisë.