Kryeministri Edi Rama u prit në audiencë nga Papa Leoni XIV këtë të enjte, më 5 shkurt, në Pallatin Apostolik të Vatikanit.
Takimi u zhvillua paradite dhe Edi Rama ishte i shoqëruar nga bashkëshortja e tij Linda Rama si dhe djali i tij. Pas audiencës private, u mbajtën bisedime zyrtare në Sekretarinë e Shtetit të Selisë së Shenjtë me kardinalin Pietro Parolin dhe kryepeshkopin Paul Richard Gallagher, sekretar për Marrëdhëniet me Shtetet dhe Organizatat Ndërkombëtare.
Sipas njoftimit të Zyrës së Shtypit të Selisë së Shenjtë, në bisedimet e përzemërta u vu në dukje marrëdhënia e mirë ekzistuese ndërmjet Selisë së Shenjtë dhe Republikës së Shqipërisë. U trajtuan tema me interes të përbashkët lidhur me marrëdhëniet ndërmjet bashkësisë kishtare dhe asaj civile.
Ndër çështjet kryesore rajonale ishte situata në vendet e Ballkanit Perëndimor dhe rrugëtimi i Shqipërisë drejt integrimit të plotë në Bashkimin Evropian.
Përditësime
Kryeministri Edi Rama mbërriti në Vatikan më 4 shkurt, i shoqëruar nga djali i tij Zaho. Ai vizitoi Bazilikën e Zojës së Këshillit të Mirë ("Regina di Albania"), ku mbajti një lutje të posaçme për popullin shqiptar, familjet dhe brezin e ri.