Kryeministri i Shqipërisë, Edi Rama, i është përgjigjur me ironi zërave kritikë dhe aludimeve politike mbi takimet e tij gjatë vizitës në Shtetet e Bashkuara të Amerikës. Pas vizitës 6-ditore, ku mori pjesë në punimet e Asamblesë së Përgjithshme të Organizatës së Kombeve të Bashkuara (OKB) në Nju Jork, kryeministri publikoi një fotografi ku shfaqet përkrah Presidentit amerikan Donald Trump dhe bashkëshortes së tij, Linda Rama.
Në reagimin e publikuar në rrjetet sociale, kryeministri shkroi: “Meqë s’e takova dot, siç thanë ata që çfarë nuk thonë, po asgjë s’bëjnë e s’na bëjnë dot, u detyrova ta bëj me IA. Po thuajuni atyre të bëjnë kujdes, se dro del që s’është IA dhe dalin prapë si kokrrat e kandarit”. Ky postim erdhi si kundërpërgjigje ndaj pretendimeve të opozitës se kreu i qeverisë shqiptare nuk ishte pritur nga zyrtarë të lartë gjatë qëndrimit të tij në SHBA.
Përveç angazhimeve diplomatike në selinë e OKB-së, ku trajtoi çështje si zhvillimi i inteligjencës artificiale, integrimi evropian dhe pozicionimi gjeopolitik i Shqipërisë, agjenda e kryeministrit Rama përfshiu edhe takime me komunitetin shqiptaro-amerikan. Në takimet e zhvilluara në shtete si Michigan dhe Nju Jork, kryeministri njoftoi plane për hapjen e një konsullate të re dhe theksoi nisjen e punës për krijimin e Regjistrit Kombëtar të Diasporës, në kuadër të vizionit strategjik “Shqipëria 2030”.