Kryeministri Edi Rama ka reaguar në lidhje me protestën që po zhvillohet në bulevard, duke publikuar të dhëna që sipas tij i përkasin njërit prej 13 firmëtarëve të saj. Përmes një postimi në rrjetet sociale, kreu i qeverisë renditi një sërë procedimesh penale, pa përmendur emrin e personit në njoftimin e tij, ndonëse media si Top Channel i referohen personit si Edviol Kulluri.
Sipas të dhënave të bëra publike nga Rama, lista e procedimeve të pretenduara përfshin këto raste:
• 2014: Rrahje në bashkëpunim, Tiranë
• 2016: Vjedhje energjie, Tiranë
• 2016: Rrahje në dëm të një shtetaseje, Tiranë
• 2017: Rrahje në grup, Durrës
• 2019: Pjesëmarrje në protestë të paligjshme, pengim qarkullimi i automjeteve dhe pengim i IMT për prishjen e ndërtimit të paligjshëm, Vlorë
• 2020: Kanosje dhe plagosje e lehtë, Vlorë
• 2021: Kanosje ndaj një shtetaseje, Vlorë
• 2022: Dhunë në familje ndaj xhaxhait të tij, Vlorë
Kryeministri e shoqëroi listën me komente ironike, duke iu referuar organizatorëve si "sorra dhe korba" që kanë marrë peng protestën nën maskën e një lëvizjeje të re. Deri në këto momente, nuk ka pasur asnjë reagim zyrtar nga ana e organizatorëve të protestës apo nga personi në fjalë për saktësinë e këtyre të dhënave.
Përditësime
Kritikët e medias dhe ekspertët ligjorë akuzuan Kryeministrin Edi Rama për keqpërdorim të të dhënave të ndjeshme të Policisë së Shtetit. Analistët e përshkruan publikimin e precedentëve penalë si një formë presioni institucional ndaj protestuesve. Kjo qasje ngre shqetësime për shkeljen e standardeve mbi privatësinë dhe etikën e komunikimit qeveritar.