Gjatë fjalës së tij në mbledhjen e grupit parlamentar të Partisë Socialiste, kryeministri Edi Rama deklaroi se qeveria duhet të ruajë kursin e saj pavarësisht debateve të forta publike. Duke iu referuar protestave të vazhdueshme lidhur me projektin në Zvërnec, të cilat shënuan ditën e 20-të, ai nënvizoi se një grup udhëheqës nuk mund të dorëzojë timonin e shtetit tek reagimet e ndikuara nga emocionet e rrjeteve sociale.
Kryeministri komentoi atë që e cilësoi si një "përzierje të hatashme ndërkombëtare" në këto protesta. Sipas tij, ka njerëz që vijnë nga Kosova dhe Maqedonia për të "shpëtuar" Shqipërinë, ndërsa vlerësoi se njerëzit që flasin me arsye e kuptojnë natyrën e vërtetë të kësaj lëvizjeje.
Sipas Rama-s, qeveria nuk ka të drejtë t'i mbyllë veshët ndaj pakënaqësisë së qytetarëve, por theksoi se "zhurma" nuk duhet të bëhet faktor vendimmarrës. Ai shtoi se ndërtimi i shtetit nuk mund të varet nga era që fryn apo nga algoritmet e platformave online, duke insistuar se një qeveri duhet të tregojë stabilitet dhe identitet në vendimet e saj politike.
Përditësime
Kryeministri Edi Rama përjashtoi kategorikisht dorëheqjen, pavarësisht thirrjeve të protestuesve. Ai e krahasoi qëndresën e tij me mitin e Odiseut përballë sirenave, duke nënvizuar se qeveria nuk do t'i nënshtrohet presionit. Rama dënoi ashpër bllokimin e Aeroportit Ndërkombëtar të Tiranës, duke e cilësuar këtë veprim si të papranueshëm për qytetarët.