Edi Rama mori pjesë në asamblenë e Partisë Socialiste në Njësinë 12 të Tiranës. Aty u ndal te rritja e ekonomisë dhe refuzoi narrativën për rritje të korrupsionit.
Ai theksoi se Shqipëria është vënë në një pozicion të ri ndërkombëtar, me respekt dhe besim të fituar. Pagat janë rritur sistematikisht, ndërsa pagesa e vjetërsisë në punë aplikohet tani për mësuesit, mjekët, infermierët, ushtarakët dhe punonjësit e policisë. Këto arritje erdhën pasi u krijuan mundësitë e nevojshme pas trashëgimisë ekonomike të mëparshme.
Sa i përket pensioneve, rritja filloi në janar me një bonus ekstra. Në janarin e ardhshëm do të jetë dyfishi, në 2028 trefishi, në 2029 katërfishi dhe në 2030 pesëfishi.
Rama përmendi rritjen e turizmit, duke numëruar vetëm pasaportat e huaja në hyrje, 12 milionë vitin e kaluar. Duke iu përgjigjur akuzave, ai deklaroi se pretendimet për rritje të korrupsionit janë të pabaza, pasi po të ishte kështu, nuk do të rritej ekonomia, pensionet, pagat, të ardhurat në arkën e shtetit apo numri i përfituesve nga garat publike.
"E refuzoj me neveri këtë narrativë që nuk dinë të thonë gjë tjetër veç vjedhje e korrupsion", u shpreh Rama.