Kryeministri Edi Rama është përfshirë në një dialog në distancë me qytetarin Nertil Shuli, lidhur me protestat që po zhvillohen prej 15 ditësh në Tiranë. Në qendër të debatit ishte transparenca për investimet në Sazan dhe Zvërnec, si dhe mjetet e përdorura nga protestuesit gjatë tubimeve të fundit.
Në përgjigjen e tij, Rama vlerësoi etikën e qytetarit, por u distancua nga format e protestës që cenojnë interesin publik. Ai deklaroi se e drejta për të protestuar është legjitime, por bllokimi i rrugëve nacionale, si aksi për në Aeroportin e Rinasit, dëmton ekonominë dhe sezonin turistik.
“Qeveria nuk pretendon se ka ndjekur procedurat, qeveria i ka të gjitha faktet dhe transparenca është pikërisht rreshtimi i këtyre fakteve”, u shpreh Rama. Ai kritikoi atë që e quajti “dhunë online” dhe “bullizim të njerëzve në rrugë”, duke shtuar se shpifjet dhe fabrikimet e përdorura nga palë të ndryshme politike apo ideologjike janë goditje ndaj imazhit të vendit.
Nga ana tjetër, Nertil Shuli argumentoi se mosbesimi ndaj institucioneve dhe kërkesa për llogaridhënie janë shtysat kryesore të pjesëmarrjes në tubime. Ai kritikoi qasjen e qeverisë ndaj protestuesve, duke e cilësuar etiketimin e tyre si “turmë e manipuluar” apo “vegla të forcave destruktive” si përçmim ndaj qytetarëve që mendojnë ndryshe.