Edi Rama ka rrëfyer për herë të parë një episod nga viti 1992, në fillimet e pushtetit të Partisë Demokratike. I ftuar në emisionin “Koha Jonë-Debat” për 35-vjetorin e gazetës “Koha Jonë”, përballë moderatorit Nikoll Lesi, kryeministri tregoi si ndihmoi piktorin shqiptar nga Mali i Zi, Gjelosh Gjoka, të takohet me presidentin Sali Berisha në Presidencë.
Sipas Ramës, Gjoka, që jetonte në Gjermani, dëshironte të takonte Berishën, por nuk arrinte ta siguronte takimin. Rama i sugjeroi se vetëm një kërkesë e tij do ta mundësonte. Pas tentativave të pasuksesshme të Gjokës, Rama dërgoi një letër prezantimi përmes një ndihmësi. Përgjigjja ishte me kusht: Berisha pranoi të presë Gjokën vetëm nëse Rama do të ishte i pranishëm.
Rama pranoi kushtin dhe shkoi në takimin në Presidencë, pavarësisht se e shihte si të vështirë për shkak të pozicionit të tij në “Koha Jonë”. Gjatë bisedës, Berisha, duke mbajtur në dorë gazetën “Koha Jonë”, tha: “Këtu është ajka e trurit të këtij vendi”.
Sipas Ramës, Berisha komentoi deputetët e grupit parlamentar të PD-së, duke thënë se “aty në Kuvend janë të gjithë me lakrën e komunizmit në kokë”.