Kryeministri Edi Rama deklaroi se ekonomia shqiptare po vijon një rritje të qëndrueshme, duke e pozicionuar vendin ndër ekonomitë me performancën më të lartë për vitet e ardhshme, sipas parashikimeve të institucioneve financiare ndërkombëtare.
Në podcast-in e tij “Flasim”, ai theksoi se deri në vitin 2030 pritet një rritje prej rreth 32% e Prodhimit të Përgjithshëm Kombëtar, çka e vendos Shqipërinë në grupin e ekonomive me rritjen më të lartë dhe më të qëndrueshme globalisht.
Rama vuri në dukje se kjo ecuri nuk është rastësore, por rezultat i reformave të ndërmarra gjatë viteve, të cilat kanë krijuar baza të forta për zhvillim të shpejtë. Këto reforma e kanë vënë vendin në kushtet për të ecur përpara me shpejtësi, mbështetur në sektorë në zhvillim të vazhdueshëm.
Një efekt i prekshëm i këtij procesi është rritja e vazhdueshme e pagave, jo vetëm në sektorin publik, por edhe në atë privat, veçanërisht për personat me kualifikim të caktuar ose zanate.
Kryeministri e cilësoi këtë zhvillim si thirrje për shqiptarët jashtë vendit, që të shikojnë me optimizëm mundësinë e kthimit. Sipas tij, për shumë prej tyre, Shqipëria ofron më shumë se vendet ku jetojnë, jo vetëm në punë e paga, por edhe ngrohtësinë e shtëpisë.