Kryeministri Edi Rama u shpreh në podkastin “Flasim” se Shqipëria do ta arrijë sovranitetin energjetik brenda mandatit aktual qeverisës. Ai nënvizoi se ky synim mbështetet në programin e detajuar dhe hapat konkretë që po ndërmarrin autoritetet.
Rama foli për vizitën e tij të fundit në Emiratet e Bashkuara Arabe, ku mori pjesë në Samitin e Javës së Zhvillimit të Qëndrueshëm. Gjatë këtij eventi, ai u ftua në panele diskutimi ku, së bashku me Kryeministrin e Malit të Zi, iu përgjigj pyetjeve mbi përpjekjet për zhvillim të qëndrueshëm, rritje të kapaciteteve energjetike dhe shfrytëzim të teknologjisë në funksion të procesit të integrimit europian.
Kryeministri shprehu krenari për bashkëpunimin trilateral mes Emirateve të Bashkuara Arabe, Shqipërisë dhe Italisë. Shqipëria ka rol kyç në këtë partneritet, si vendi ku do të krijohet kapacitet gjenerimi i energjisë së gjelbër. Energjia e prodhuar do të transmetohet përmes një kablli nënujor që lidh Shqipërinë me Italinë, drejt Italisë dhe vendeve të tjera europiane.
Sipas Ramës, ky bashkëpunim i jep Shqipërisë një avantazh të rëndësishëm strategjik. Ai përcjelli mesazhin se Shqipëria do të jetë sovrane në energji, duke theksuar se shumica qeverisëse ndjen krenari për këtë orientim. Procesi i integrimit europian kërkon përkushtim të madh dhe volum të lartë legjislativ, por rruga drejt Bashkimit Europian do të jetë e pandalur.