Edi Rama, kryeministër i Shqipërisë, mori pjesë më 20 prill në një takim me përfaqësues të agroturizmit në Tiranë. Gjatë fjalës së tij, ai u ndal te ligji i ri për portet turistike dhe te Paketa e Maleve.
Rama hodhi poshtë pretendimet se qeveria po ia jep portet oligarkëve. Ai sqaroi se ndryshimet në ligj janë të domosdoshme për të mos penguar investitorët në bregdet, të cilët vijnë me projekte që përfshijnë marina të vogla. Sipas ligjit ekzistues, marina kërkon tender pasi deti është në administrimin e shtetit, ndërsa pjesa tjetër e projektit lejohet. Kjo, sipas Ramës, krijon "territore luftërash" dhe mund të çojë në braktisjen e projekteve.
Kryeministri theksoi se Shqipëria ka deficencë të madhe me pikat e ankorimit në det, ndryshe nga vendet e tjera që kanë qindra porte dhe vende ankorimi. Ai sqaroi se nuk bëhet fjalë për porte të mëdha si marina e Durrësit apo e Vlorës, por për porta të vogla turistike.
Sa i përket Paketës së Maleve, Rama u shpreh se kjo nuk hap rrugën për investime në parqet kombëtare, por lejon zhvillime jo masive në territoret e zonave të mbrojtura. Ai shtoi se kritikët nuk kanë lidhje me punët e shtetit prej vitesh.