Kryeministri Edi Rama do të mbledhë ditën e shtunë, më 20 qershor, deputetët e Partisë Socialiste dhe ministrat e kabinetit qeveritar në një takim të zgjeruar në Pallatin e Brigadave. Takimi, i cili do të nisë në orën 10:00, shënon rikthimin e konsultimeve të përmuajshme politike që nuk ishin zhvilluar prej muajit prill.
Mbledhja vjen në një periudhë tensionesh politike, të shënuara nga protestat qytetare që kanë hyrë në ditën e 19-të. Protestat, të cilat fillimisht u përqendruan te projekti në Zvërnec dhe ndryshimet në ligjin për zonat e mbrojtura, janë përshkallëzuar me kërkesa për dorëheqjen e kreut të qeverisë. Një protestë tjetër kombëtare është paralajmëruar për pasditen e së shtunës.
Një zhvillim tjetër që shoqëron këtë takim është ndryshimi në përbërjen e mazhorancës. Deputetja Marjana Koçeku, e cila kryesonte listën e socialistëve të Shkodrës, është larguar zyrtarisht nga grupi parlamentar dhe ka bërë të ditur vendimin për të vijuar mandatin si deputete e pavarur.
Në takimin e së shtunës, pritet që kryeministri Rama të diskutojë mbi agjendën politike dhe prioritetet e qeverisë për periudhën në vijim, si dhe të artikulojë qëndrimin zyrtar të shumicës lidhur me situatën aktuale.
Përditësime
Partia Socialiste njoftoi se mbledhja e zgjeruar e grupit parlamentar do të zhvillohet në kuadër të takimeve mujore, me një agjendë të planifikuar për vitin 2026.
Kryeministri Edi Rama ka thirrur mbledhjen e zgjeruar të grupit parlamentar socialist, ku Taulant Balla do të drejtojë punimet. Axhenda pesëpikëshe përfshin:
- Diskutimin për Konferencën e 8-të Ndërqeveritare Shqipëri-BE dhe paketën e ligjeve për integrimin.
- Raportimin e Arbjan Maznikut për ecurinë e reformës territoriale.
- Analizën e projekteve në Zvërnec dhe Sazan.
- Përcaktimin e kufirit kohor prej 2 minutash për pyetjet e deputetëve.