Kryeministri Edi Rama hodhi poshtë akuzat e protestuesve për "tradhti", duke i cilësuar ato si të pabaza. Gjatë një takimi në Apoloni të Fierit, organizuar me rastin e 35-vjetorit të themelimit të Partisë Socialiste, kreu i qeverisë rikujtoi qëndrimet e tij zyrtare, duke deklaruar se pavarësia e Kosovës është një realitet i pakthyeshëm, fakt të cilin ai e ka komunikuar publikisht edhe nga pallati i presidentit në Serbi.
Lidhur me debatet për pronat shtetërore, kryeministri u ndal te projekti i zhvillimit në ishullin e Sazanit. Ai sqaroi se qeveria është duke negociuar prej më shumë se dy vitesh me investitorët për të përcaktuar formulën e zhvillimit të zonës. Sipas Ramës, thelbi i marrëveshjes qëndron në faktin se ndërtimet private do të jenë të kufizuara, ndërsa pjesa tjetër e territorit mbetet pronë e Republikës së Shqipërisë.
"Sazani ka qenë, është dhe do të mbetet tokë e Republikës së Shqipërisë. Ne përfaqësojmë shtetin dhe në investim merr pjesë Shqipëria si ortak në biznes, ku të ardhurat që vijnë i shkojnë shtetit", u shpreh kryeministri. Ai shtoi se procesi ende nuk është finalizuar me firmosjen e një marrëveshjeje përfundimtare, pasi palët vazhdojnë bisedimet mbi detajet teknike. Në fjalën e tij, Rama kritikoi gjithashtu format e protestës së opozitës, duke theksuar se patriotizmi dhe tradhtia nuk mund të reduktohen në retorikë politike.