Kryeministri Edi Rama ka reaguar ndaj protestave në Tiranë gjatë fjalës së mbajtur në Elbasan, me rastin e 35-vjetorit të themelimit të Partisë Socialiste. Ai ka hedhur poshtë thirrjet për dorëheqje, duke i cilësuar kërkesat e protestuesve si veprime që shkojnë në drejtim të gabuar në një moment historik për vendin.
Sipas Ramës, protestuesit refuzojnë të dëgjojnë faktet lidhur me zhvillimet mjedisore, duke u përqendruar te retorika për dorëheqjen e qeverisë. Ai theksoi se misioni kryesor i qeverisë mbetet integrimi i Shqipërisë në Bashkimin Evropian.
“Nëse je i shqetësuar për flamengot apo natyrën, je i pari që duhet të interesohesh për faktet, jo për gënjeshtrat. Je i pari që duhet të dëgjosh të vërtetën dhe jo të bësh tangërllik: ‘nuk duam të dëgjojmë, duam dorëheqjen’. Cilën dorëheqje? Dorëheqjen nga misioni i PS-së për anëtarësimin e Shqipërisë në BE?”, deklaroi kryeministri.
Ai gjithashtu i quajti ata që refuzojnë dialogun si “delirantë dhe sharlatanë”, duke shtuar se largimi i qeverisë në këtë fazë do të cenonte përfaqësimin e vendit në proceset integruese ndërkombëtare.