Ish-kryeministri i Kosovës dhe kryetari i Aleancës për Ardhmërinë e Kosovës, Ramush Haradinaj, ka marrë një kërcënim publik përmes rrjeteve sociale. Një profil i dyshimtë me emrin Goran Gogo Frkz, i cili përdor gjuhën cirilike, ka shkruar një koment në profilin zyrtar të Haradinajt duke përdorur gjuhë fyese dhe kërcënuese ndaj familjes së tij.
Përmbajtja e mesazhit, e cila është përkthyer si një paralajmërim për sulm ndaj anëtareve femra të familjes së tij, ka ngjallur shqetësim. Ndërsa disa burime sugjerojnë se profili mund të ketë lidhje me Rusinë, Gazeta Sinjali thekson se këto të dhëna mbeten të pakonfirmuara dhe të pavërtetueshme vetëm përmes rrjeteve sociale.
Ky rast ndodh në një kohë kur emri i Ramush Haradinajt përmendet në debatet politike për postin e Presidentit të Republikës së Kosovës, si dhe në vazhdën e proceseve gjyqësore në Gjykatën e Hagës. Kjo nuk është hera e parë që ish-kryeministri bëhet objektiv i kërcënimeve. Pak kohë më parë, ai u kërcënua me vrasje nga një person i identifikuar si Skender Llugiqi, i cili pas hetimeve u arrestua dhe u vendos në paraburgim.
Gjithashtu, anëtari i familjes, Daut Haradinaj, kishte deklaruar më herët se kishte marrë kërcënime nga persona që i përshkroi si pjesëtarë të frontit rus dhe serb në Ukrainë. Media të ndryshme kanë dërguar kërkesa pranë Policisë së Kosovës për të mësuar nëse ky rast i fundit është zyrtarizuar përmes një kallëzimi penal.