Ish-kryeministri i Kosovës, Ramush Haradinaj, ka përkujtuar përmes një shkrimi në rrjetet sociale figurën e kolonel Ahmet Krasniqit. Në mesazhin e tij, Haradinaj vlerësoi se përvjetorët shërbejnë për të kujtuar çmimin e lartë që populli i Kosovës pagoi për lirinë.
Sipas Haradinajt, Ahmet Krasniqi përfaqësonte shembullin e profesionalizmit, sakrificës dhe përkushtimit ndaj atdheut. Megjithëse vrasja e kolonelit la një zbrazëti të madhe, ai vlerësoi se ideali i tij për krijimin e një ushtrie të rregullt dhe institucionale është jetësuar përfundimisht.
Ahmet Krasniqi mbante postin e ministrit të Mbrojtjes në Qeverinë në Ekzil të Republikës së Kosovës, të udhëhequr në atë periudhë nga Bujar Bukoshi. Ai u vra në Tiranë më 21 shtator 1998. Deri në ditët e sotme, rrethanat dhe autorët e kësaj vrasjeje mbeten të pazbardhura.