Ish-kryetari i Aleancës për Ardhmërinë e Kosovës (AAK), Ramush Haradinaj, ka shprehur bindjen e tij se katër ish-drejtuesit e Ushtrisë Çlirimtare të Kosovës (UÇK) që po përballen me procese gjyqësore në Gjykatën Speciale në Hagë, do të shpallen të pafajshëm dhe do të kthehen në Kosovë.
Në një intervistë për emisionin “Rubikon” në Klan Kosova, Haradinaj argumentoi se lufta e UÇK-së kishte karakter çlirimtar dhe mbrojtës përballë forcave serbe. Ai shprehu rezerva të forta mbi logjikën e ligjit ndërkombëtar në këtë rast, duke bërë krahasime me situatën globale dhe trajtimin e personave të dënuar për krime në Serbi.
“Unë besoj që këta do të vijnë në Kosovë, pra do të vijnë, do të lirohen të katërtit që janë tash. Nuk po e shoh logjikën e ligjit ndërkombëtar. Ju shihni çka po ndodh në botë, sa luftëra ka, sa është kolaterali i luftërave ku ka edhe zhvillime. Pastaj e shihni Serbinë që e ndërroi njerëz që kanë kryer krime, të dënuar për krime”, deklaroi Haradinaj.
Ish-kryeministri kritikoi ashpër mënyrën se si po zhvillohet procesi gjyqësor në Hagë. Sipas tij, deri më tani gjykata ka dhënë kryesisht verdikte dënuese, ndërsa kërkesat e mbrojtjes për lirim të përkohshëm ose leje të tjera procedurale janë refuzuar në shumicën e rasteve. Deklarata e Haradinajt vjen në një moment kur çështja e ish-krerëve të UÇK-së mbetet një temë me ndjeshmëri të lartë për opinionin publik në Kosovë.