Dy raste të sulmeve seksuale ndaj burrave janë raportuar gjatë ditëve të fundit në Kosovë, duke vënë në lëvizje organet e hetuesisë.
Rasti në Qendrën Korrektuese në Dubravë
Në Qendrën Korrektuese në Dubravë, tre të dyshuar janë vënë nën hetime për kryerjen e veprës penale të dhunimit. Sipas zëdhënësit të Prokurorisë Themelore në Pejë, Shkodran Nikçi, ngjarja ka ndodhur më 25 gusht 2026, rreth orës 21:00. Viktima, shtetas kosovar, ka deklaruar se fillimisht është sulmuar fizikisht nga tre personat e dyshuar e më pas është dhunuar seksualisht. Ai ka pranuar trajtim mjekësor në Spitalin e Pejës dhe rasti është duke u hetuar nën urdhrat e prokurorit përkatës.
Rasti në Parkun e Arbërisë në Prishtinë
Një tjetër rast është raportuar në kryeqytet, ku një 22-vjeçar është sulmuar seksualisht mbrëmjen e 27 gushtit 2026. Sipas dëshmisë së viktimës, gjersa po ecte në parkun e Arbërisë rreth orës 22:00, një person rreth 50-vjeçar i është afruar duke filluar bisedën. Në një pjesë të shtegut pa ndriçim, i dyshuari e ka kapur për krahu dhe e ka prekur në pjesën intime. Viktima ka njoftuar se pas këtij incidenti ka arritur të largohet me vrap dhe ka njoftuar një pjesëtar të Policisë së Kosovës që ndodhej në afërsi. Policia e Kosovës ka konfirmuar se rasti është iniciuar si sulm seksual dhe po vazhdojnë hetimet për të identifikuar personin e përfshirë në këtë incident.