Portieri i Meksikës, Raúl Rangel, po shfaqet si një ndër protagonistët kryesorë të Kupës së Botës 2026. Falë paraqitjeve të tij, kombëtarja meksikane ka siguruar kalimin në fazën e 16-të, ku do të përballet me Anglinë.
Rangel ka regjistruar 348 minuta pa pësuar gol, duke thyer rekordet e mëparshme të vendosura nga portierët Ignacio Calderón (283 minuta në vitin 1970) dhe Pablo Larios (276 minuta në vitin 1986). Kjo ecuri e bën atë portierin meksikan me serinë më të gjatë pa pësuar gol në historinë e këtij kompeticioni.
Statistikat e Footmob tregojnë se Rangel ka parandaluar 1.70 xG (gola të pritshëm), duke u renditur ndër gardianët më efikas të turneut. Ai është gjithashtu portieri i shtatë në historinë e Kupave të Botës që ruan portën e paprekur në katër ndeshjet e tij të para, duke iu bashkuar emrave si Gilmar, Gordon Banks, Emerson Leao, Carlos, Walter Zenga dhe Pascal Zuberbühler.
Në fitoren 3-0 ndaj Republikës Çeke, Rangel u zëvendësua në minutën e 78-të nga Guillermo Ochoa, për t'i dhënë mundësi këtij të fundit të aktivizohet në Kupën e tij të gjashtë të Botës. Trajneri Javier Aguirre ka vlerësuar qetësinë dhe rritjen profesionale të portierit të Chivas, pavarësisht disa momenteve të pasigurta në ndeshjen ndaj Afrikës së Jugut.
Përtej futbollit, media ka nxjerrë në pah edhe historinë e tij personale të sakrificës, ku përpara karrierës profesionale, ai ka punuar në fusha të ndryshme, përfshirë ndërtimin, për të ndihmuar familjen e tij.