Brajan Gruda po gjen formën e tij te RB Leipzig. Në ndeshjen e fundit kundër TSG Hoffenheim, ku skuadra gjermane fitoi me rezultatin 5-0, sulmuesi shqiptar 21-vjeçar shënoi dy gola dhe dha një asist.
RB Leipzig e ka huazuar Grudën nga Brighton gjatë periudhës dimërore, pa opsion blerjeje. Kjo lë të pasigurt të ardhmen e tij pas verës. Sipas gazetës gjermane Kicker, klubi mund të kërkojë bisedime me Brighton për një transferim të përhershëm.
Trajneri Ole Werner foli pozitivisht për lojtarin: "Që nga dita e parë, të gjithë e kuptuam se ai është një lojtar që mund të na ndihmojë. Ai përshtatet shumë mirë me ekipin, e kupton lojën dhe mund të luajë në disa pozicione. Jemi shumë të lumtur që e kemi këtu."
Sa i përket një nënshkrimi të përhershëm, Werner shtoi: "Çdo gjë tjetër do të jetë çështje që do të duhet të zgjidhet midis klubeve dhe lojtarit. Për momentin, jemi të lumtur që ai është këtu dhe na ndihmon të arrijmë qëllimet tona."
Gruda synon të marrë pjesë në Kampionatin Botëror me Gjermaninë, megjithëse aktualisht grumbullohet vetëm me përfaqësuesen U21. Ai ka të drejtë të zgjedhë midis Gjermanisë, Shqipërisë dhe Kosovës, ku të fundit kanë shprehur interes për të.