Pas vendimit të Qeverisë së Kosovës për të miratuar dhe proceduar në Kuvend ndryshimet në Ligjin për Dhomat e Specializuara dhe Zyrën e Prokurorit të Specializuar, kanë ardhur reagimet e para nga radhët e Partisë Demokratike të Kosovës (PDK). Ky vendim vjen pas shqyrtimit të një kërkese të Kuvendit të datës 23 shtator dhe mban nënshkrimin e kryeministrit Albin Kurti.
Deputeti i PDK-së, Eman Rrahmani, ka vlerësuar se ky veprim i ekzekutivit është rezultat i drejtpërdrejtë i protestave të zhvilluara së fundmi në mbështetje të ish-krerëve të Ushtrisë Çlirimtare të Kosovës (UÇK). Ai u ka bërë thirrje qytetarëve që presionin ta zhvendosin tani te deputetët e Kuvendit, me qëllim që projektligji të hidhet në votim sa më shpejt.
“Unë do të votoj PËR! Do të jetë vota me peshën më të madhe të ndërgjegjes që kam dhënë gjatë katër mandateve të mia si deputet”, ka shkruar Rrahmani në rrjetet sociale, duke theksuar se tashmë përgjegjësia mbetet te secili përfaqësues në legjislativ.
Në të njëjtën linjë, shefi i Grupit Parlamentar të PDK-së, Arian Tahiri, e ka mirëpritur vendimin e Qeverisë. Ai ka theksuar se çështjet që ndërlidhen me UÇK-në kërkojnë një trajtim me përgjegjësi, sinqeritet dhe korrektësi, duke kërkuar shmangien e kalkulimeve politike dhe përçarjeve në këtë proces. Sipas Tahirit, në çështjet që prekin themelet e lirisë, përfaqësuesit duhet të jenë të bashkuar.