Menaxheri i boksierit shqiptar Kristian Prenga, Keith Sullivan, ka reaguar për herë të parë ndaj dyshimeve dhe teorive që qarkulluan në rrjetet sociale pas përballjes me Anthony Joshua. Pas një fillimi premtues ku Prenga rrëzoi dy herë kundërshtarin, britaniku u rikthye duke siguruar fitoren me nokaut teknik në rundin e dytë, një ndryshim i rrjedhës së ndeshjes që ngjalli reagime të ndryshme tek ndjekësit e sportit.
Në një deklaratë për talkSPORT, Sullivan i cilësoi si të pavërteta pretendimet për ndikime të jashtme apo marrëveshje në lidhje me rezultatin e ndeshjes. Ai gjithashtu mohoi kategorikisht se kishte pasur ndërhyrje nga organizatorët ose personat e lidhur me kompaninë Sela në këndin e boksierit gjatë zhvillimit të meçit. Ai theksoi se as Turki Alalshikh nuk ishte i pranishëm në Jeddah në atë kohë.
Sipas Sullivan, paraqitja e boksierit shqiptar në rundin e dytë ishte pasojë e drejtpërdrejtë e një gjendjeje të rëndë shëndetësore. Prenga kishte qëndruar tetë ditë në shtrat për shkak të temperaturës së lartë dhe nuk kishte mundur të zhvillonte asnjë seancë stërvitore apo sparing në dy javët para duelit. Sullivan bëri të ditur se pas shpenzimit të energjive në rundin e parë, boksieri ishte ndier fizikisht i rraskapitur, duke hasur vështirësi të mëdha për të marrë frymë gjatë rundit të dytë.
Menaxheri sqaroi se qëllimi i këtij shpjegimi nuk është gjetja e justifikimeve për rezultatin e ndeshjes, por sqarimi i gjendjes reale të boksierit. Ai vlerësoi përballjen si një nga momentet më emocionuese të boksit të kohëve të fundit, pavarësisht epilogut final për sportistin shqiptar.