Sulmuesi anësor 24-vjeçar, Michael Olise, mbetet një objektiv i Real Madridit, por klubi spanjoll nuk planifikon ndonjë lëvizje konkrete para fundit të gushtit. Sipas gazetarit Joaquin Maroto, presidenti Florentino Perez synon të presë deri në periudhën 29-31 gusht për të vlerësuar kërkesat përfundimtare të skuadrës dhe pozicionin e klubit gjerman.
Sipas raportimeve, mes Florentino Perezit dhe presidentit të Bayern Munichut, Herbert Hainer, ekziston një marrëveshje e heshtur për të mos kontaktuar lojtarët pa njoftim paraprak zyrtar. Kjo ka penguar deri më tani çdo hap formal nga ana e madrilenëve. Përkundër spekulimeve se Kylian Mbappe po mbështet afrimin e tij, klubi spanjoll nuk ka bërë asnjë propozim zyrtar.
Nga ana tjetër, Bayern Munich mbetet i vendosur për ta mbajtur lojtarin, i cili ka një kontratë aktive deri më 30 qershor 2029. Klubi gjerman ka konfirmuar publikisht angazhimin për të ardhmen e lojtarit, i cili në sezonin 2025/2026 regjistroi 15 gola dhe 19 asistime në Bundesligë. Si pjesë e strategjisë për ta bindur atë të qëndrojë, bavarezët planifikojnë t'i ofrojnë një kontratë të re me pagë vjetore që mund të arrijë në 25 milionë euro, thuajse duke e dyfishuar atë aktuale.
Lojtari pritet të zhvillojë një takim me menaxhmentin e klubit pas përfundimit të aktiviteteve me përfaqësuesen për të diskutuar të ardhmen e tij dhe ambiciet sportive të klubit.