INSTAT publikoi të dhënat e lëvizjeve kufitare për janar 2026, duke treguar rënie 1.5% të hyrjeve të shtetasve të huaj, me 552 mijë vizitorë krahasuar me janar 2025.
Kjo përbën herën e parë që hyrjet në janar shënojnë rënie që nga periudha e pandemisë. Pas vitit 2022, Shqipëria u bë destinacion i preferuar turistik, duke zgjeruar sezonin përtej verës me vizita në qytete si Tirana, Berati, Gjirokastra dhe Korça.
Për krahasim, në janar 2025 hyrjet u rritën me 14.5%, ndërsa në janar 2024 me gati 30%. Tendenca e ngadalësimit nisi në vitin 2025, kur rritja vjetore ishte vetëm 6.6%, niveli më i ulët që nga pandemia.
Sipas aktorëve të tregut, ndikim negativ patën moti i keq i janarit dhe rritja e çmimeve të restoranteve e ushqimeve, ndërkohë që akomodimi mbetet i lirë.
Hyrjet totale në Shqipëri arritën 1.196.550 shtetas shqiptarë e të huaj (+3.3% krahasuar me janar 2025). Daljet totale shënuan 1.343.073 persona (-1.3%). Daljet e shtetasve shqiptarë u rritën me 3.3%.
98% e hyrjeve të të huajve ishin për qëllime personale. Pjesa më e madhe e vizitorëve vijnë nga Evropa Jugore (88% e hyrjeve evropiane), e ndjekur nga Evropa Perëndimore me 6%.