Qarku i Kukësit u përfshi gjatë natës së mërkurës nga reshje shiu me intensitet mesatar, të shoqëruara herë pas here me erë. Këto reshje, që vazhduan deri në orët e para të mëngjesit të enjtes më 5 shkurt 2026, krijuan vështirësi në disa segmente rrugore.
Si pasojë e motit të paqëndrueshëm, në akse rrugore të qarkut u regjistruan rënie gurësh dhe inertesh nga shpatet malore, veçanërisht në zona me terren të thyer. Problema më e theksuar ndodhi në segmentin Kukës-Bushtricë, ku në orët e para të ditës ranë gurë dhe masa dherash, duke penguar përkohësisht lëvizjen e automjeteve.
Subjektet kontraktore të mirëmbajtjes rrugore ndërhynë menjëherë me mjete dhe forca pune për pastrimin e rrugës. Aktualisht, ky aks kombëtar, që lidh Kukësin me Peshkopinë, është i qarkullueshëm normalisht.
Strukturat vendore raportojnë se në bashkitë Kukës, Tropojë dhe Has nuk ka dëme në banesa apo infrastrukturë publike dhe nuk janë regjistruar situata emergjente. Furnizimi me energji elektrike vazhdon pa ndërprerje në të gjithë qarkun.
Autoritetet vendore dhe shërbimet emergjente janë në gatishmëri për monitorim. U kërkohet drejtuesve të mjeteve të tregojnë kujdes të shtuar në akset malore dhe të ndjekin informacionet zyrtare.