Reshje të dendura shiu me intensitet të lartë kanë përfshirë Durrësin dhe disa zona të tjera në vend sot, duke shkaktuar përmbytje të rëndësishme në rrugë dhe dëme në infrastrukturë. Si pasojë e kësaj situate, autoritetet vendore kanë marrë vendime të rëndësishme për sigurinë e popullsisë.
Përmbytjet në Durrës
Disa akse rrugore në Durrës janë mbuluar tërësisht nga uji dhe janë bërë të pakalueshme, duke paralizuar qarkullimin e automjeteve dhe këmbësorëve. Sipas burimeve, rrugët më problematike përfshijnë: "Mujo Ulqinaku", "Hysen Myshketa", "Marta Buda", "Jahja Ballhysa", "Kristo Sotiri", "Glaukia", "Vaso Pasha", "Jeta Re", "Vllazërimi", "Jezerca", "Azem Hajdari", "Mbreti Pirro" dhe "Enkelejvo", të cilat ndodhen në lagjet nr. 12, 13, 14, 17 dhe 18. Bllokime të qarkullimit janë raportuar edhe nga zona e Mauzoleumit të Dëshmorëve deri në zonën e Durrësit të Ri.
Gjendje e rënduar raportohet edhe në njësinë administrative Rrashbull dhe në Manzë, ku ura e fshatit Borç rrezikon shembjen për shkak të prurjeve të mëdha të ujit.
Pezullimi i mësimit
Për shkak të përmbytjeve dhe pamundësisë së lëvizjes së prindërve, fëmijëve dhe nxënësve, mësimi është pezulluar në të gjitha shkollat e Durrësit. Sipas Zyrës Vendore të Arsimit Durrës, mësimi po zhvillohet vetëm në katër shkolla: shkolla 9-vjeçare "Shaqe Mazreku" në qytetin e Durrësit, ndërsa tre të tjerat ndodhen në njësitë administrative - konkretisht në shkollën "Njazi Mastori" në Sukth, "Rexhep Mezini" në Ishëm dhe "Pren Simoni" në Draç.
Përveç shkollave, mësimi është ndërprerë edhe në Universitetin e Durrësit. Një listë e plotë e çerdheve dhe kopshteve të mbyllura përfshin: Kopshtin "Sotir Noka", Kopshtin "Met Hasa", Çerdhen nr.1, Konviktin "Beqir Çela", Kopshtin "Neim Babameto", Kopshtin "Durrësi i Ri" dhe Kopshtin "Fidanishtja".
Zyra Vendore e Arsimit bën me dije se vendimi është marrë për të garantuar sigurinë e nxënësve dhe stafit mësimor, ndërsa situata po monitorohet në vijimësi dhe mësimi do të rifillojë sapo kushtet të normalizohen.
Evakuime dhe përgatitje për përmbytje të mëtejshme
Deri më tani, autoritetet kanë evakuuar 10 familje, me nga 3-4 anëtarë secila. Familjet janë sistemuar pranë Kovalishencës. Një familje nga zona e ish-Kënetës është evakuuar në Shtëpinë e Pushimit të Ministrisë së Brendshme në plazhin e Durrësit, pasi banesa e tyre është përmbytur.
Situata paraqitet problematike edhe në kodrën e Currilave, ku janë evidentuar rrëshqitje dheu. Sipas parashikimeve meteorologjike, reshjet e dendura pritet të vijojnë deri në orët e drekës. Të gjitha ekipet e Bashkisë së Durrësit ndodhen në terren dhe po punojnë intensivisht për menaxhimin e situatës dhe minimizimin e pasojave.
Situata në Lezhë
Përmbytjet kanë arritur edhe në Lezhë, ku qytetarët po përballojnë problematika të ngjashme. Për shkak të reshjeve të rëna gjatë orëve të natës, mësimi në shkollat 9-vjeçare "Kosova" dhe "Gjergj Fishta" në Lezhë është pezulluar.
Rekomandime të policisë
Policia e Shtetit ka dalë me njoftimet zyrtare lidhur me problematikat e hasura në qarkullim. Policia rekomandon që automjetet që vijnë nga jugu në drejtim të Tiranës, të qarkullojnë nga Rruga e Plepave për në Ndroq dhe nga rruga Rrogozhinë-Elbasan-Tiranë. Për në Durrës, kalimi do të bëhet nga rruga e universitetit, në drejtim të Spitallës dhe në rrugën Tiranë-Elbasan-Rrogozhinë.
Autoritetet u bëjnë thirrje qytetarëve të shmangin lëvizjet e panevojshme dhe të tregojnë kujdes maksimal në lëvizjet e domosdoshme. Kryeministri Edi Rama theksoi se nuk është evidentuar asnjë problematikë të rëndë, ndërsa KESH është duke monitoruar dhe menaxhuar situatën në kaskadën e Drinit, ku si pasojë e rritjes së prurjeve, kanë nisur shkarkimet e kontrolluara nga HEC Koman dhe HEC Vau i Dejës.