Murtaja e ruminantëve është rikthyer në qarkun e Shkodrës pas afro një viti, duke prekur njësinë administrative Dajç. Ministria e Bujqësisë nxori urdhër për vendosjen në karantinë të zonës në një rreze prej 3 deri në 10 kilometra.
Rasti i parë për këtë vit u konfirmua zyrtarisht tre ditë më parë në fshatin Mali i Gjymtit. Në fermën e Sokol Volajt u groposën rreth 20 krerë dele, ndërsa pritet asgjësimi i afro 60 krerëve të tjera. Dëmi ekonomik për fermerit vlerësohet midis 10 dhe 15 milionë lekësh të vjetër dhe ai shpreson të marrë dëmshpërblim.
Administratori i Dajçit, Broz Pjetrani, shprehu dyshime për raste të tjera të mundshme dhe njoftoi se do të kryhen inspektime dhe analiza të mëtejshme. Drejtoria rajonale e ekstensionit bujqësor në Shkodër ka filluar kontrolle edhe në zona të tjera për të parandaluar përhapjen e sëmundjes.
Autoritetet theksojnë se kjo sëmundje prek vetëm kafshët dhe nuk transmetohet tek njeriu. Vitin e kaluar në Shkodër u regjistruan tre raste të ngjashme, të cilat çuan në asgjësimin e bagëtive të prekura dhe vendosjen e karantinës brenda afateve ligjore.