Rinia Demokratike e Kosovës (RDK) ka zhvilluar sot një aksion simbolik para ndërtesës së Kuvendit të Kosovës, duke protestuar kundër bllokadës institucionale. Aktivistët vendosën në dyert e Kuvendit pankarta me fotografitë e ushtrueses së detyrës së presidentes, Albulena Haxhiu, kryeministrit në detyrë, Albin Kurti, dhe kryesuesit të seancës konstituive, Avni Dehari, duke i etiketuar ata si “Shkelësit e Kushtetutës”.
Kryetarja e RDK-së, Arbnora Salihu, deklaroi se aksioni synon të rikujtojë obligimet kushtetuese për përmbylljen e konstituimit të Kuvendit. Sipas Salihut, Kushtetuta parasheh një afat prej 30 ditësh për konstituimin e Kuvendit nga dita e shpalljes zyrtare të rezultateve të zgjedhjeve. Ajo theksoi se Rregullorja e Kuvendit përcakton që një ndërprerje gjatë seancës konstituive nuk mund të zgjasë më shumë se 48 orë.
Salihu u bëri thirrje Lëvizjes Vetëvendosje dhe deputetëve që të ndërpresin praktikën e shkeljeve kushtetuese dhe të vazhdojnë seancën. Gjatë aksionit, përfaqësuesit e RDK-së vendosën simbolikisht tri shkallë në hyrje të Kuvendit, të cilat përfaqësonin Kushtetutën, vendimin e Gjykatës Kushtetuese të vitit 2025 dhe Rregulloren e Kuvendit, duke kërkuar që këto të vihen në funksion.
Ky aktivitet vjen në një periudhë tensionesh politike, ku partitë opozitare, përfshirë Partinë Demokratike të Kosovës (PDK), kanë kërkuar vazhdimisht zhbllokimin e procesit. Në ditët e fundit, veprime të ngjashme janë zhvilluar edhe para ndërtesës së Qeverisë së Kosovës.
Përditësime
Autoritetet kanë larguar pankartat dhe fotografinë e vendosur nga aktivistët e Rinisë Demokratike të Kosovës (RDK) nga dyert e Kuvendit të Kosovës. Aksioni për heqjen e materialeve u krye pak kohë pas përfundimit të protestës simbolike të zhvilluar në hyrje të institucionit.