Robert Jenrick, ish-ministër i Emigracionit në qeveritë konservatore britanike, është përjashtuar nga të gjitha funksionet drejtuese në Partinë Konservatore dhe ka dhënë dorëheqjen nga vetë partia më 15 janar 2026. Kjo vjen pas humbjes ndaj Laburistëve në zgjedhjet e 2024-s, që i kaloi konservatorët në opozitë.
Jenrick mbante rolin në kabinetin hije të opozitës për çështjet e Drejtësisë. Ai njihet për qëndrimet e ashpra kundër emigracionit, veçanërisht ndaj shqiptarëve. Një video e tij u bë virale, ku u kërkonte oficerëve të emigracionit të kapnin shqiptarët në Britani dhe t'i kthenin në vendin e origjinës.
Më herët, Jenrick kishte dhënë dorëheqjen nga posti i ministrit në Home Office gjatë qeverisë së kryeministrit Rishi Sunak, në lidhje me politikën e dërgimit të azilkërkuesve në Ruandë. Karriera e tij ka parë ndryshime ideologjike: fillimisht kundërshtar i Brexit-it, si Boris Johnson, më pas ka adoptuar qëndrime më të forta në çështjet e emigracionit.
Kryeministri laburist Keir Starmer e ka cilësuar largimin e Jenrick-ut si "ikje nga një anije që po mbytet", duke iu referuar gjendjes së Partisë Konservatore. Partia po përjeton largime të shumta deputetësh dhe figurash të larta drejt Partisë Reform të Nigel Farage.
Jenrick ka flirtuar me Reform UK prej kohësh. Gjuha e tij në emigracion ngjan me atë të Farage, çka rrit gjasat për bashkimin e tij me partinë, e cila fiton mbështetje në sondazhe.