Rolando Maran do të jetë trajneri i ri i Kombëtares Shqiptare. Ditën e djeshme, trajneri italian u prezantua para mediave në një konferencë shtypi, ku foli edhe për aventurën e tij me Shqipërinë.
Kjo do të jetë përvoja e parë e Maranit me një kombëtare. Trajneri 62-vjeçar vjen nga një karrierë e gjatë në klube dhe ka zgjedhur një skemë që i përshtatet lojtarëve kryesorë të Shqipërisë.
Ndryshe nga Silvinjo, i cili preferonte formacionin 4-3-3, Maran do të përdorë skemën 4-3-1-2. Në këtë formacion do të ketë katër mbrojtës, tre mesfushorë, një mesfushor sulmues dhe dy sulmues qendrorë.
Skema e re krijon më shumë hapësirë për mesfushorin "10", duke i dhënë mundësi Muçit dhe Bajramit që të luajnë në pozicionet e tyre të preferuara. Sulmuesit e krahut, të cilët shpesh ishin improvizime në periudhën e Silvinjos, dalin jashtë skemës kryesore.