Administrata e qytetit të Romës ka vendosur një tarifë hyrjeje prej 2 eurosh për vizitorët që dëshirojnë të afrohen deri te bordura e Shatërvanit të Trevit, duke filluar nga 2 shkurti 2026. Kjo masë, e zbatuar për herë të parë, synon të rregullojë fluksin e vizitorëve në një nga atraksionet më të njohura turistike të kryeqytetit italian.
Dhjetëra mijëra vetë vizitojnë çdo ditë shatërvanin për të bërë fotografi ose për të hedhur një monedhë në ujë. Sheshi i madh përpara shatërvanit mbetet i lirë për t’u vizituar, ndërsa hyrja në zonën direkte pranë bordurës kushton 2 euro.
Sipas autoriteteve të qytetit, tarifa synon "t’i kundërvihet tejmbushjes së zonës, të përmirësojë përvojen e vizitorëve dhe të mbrojë një nga monumentet më të dashura të qytetit".
Nga kjo masë përjashtohen banorët e Romës, personat me aftësi të kufizuara bashkë me shoqëruesit e tyre, si dhe fëmijët nën 6 vjeç.
Masa kundër tejmbushjes
Rreth një vit më parë, administrata kishte kufizuar numrin e vizitorëve njëkohësisht në 400 vetë rreth shatërvanit. Vitin e kaluar, Shatërvanin e Trevit e vizituan më shumë se 10 milionë vetë, ndërsa në ditët e pikut numri arrinte deri në 70 000 vizitorë.
Tradita e hedhjes së monedhës për të shprehur një dëshirë ka nisur që nga viti 1954, e frymëzuar nga filmi "Three Coins in the Fountain".
Përditësime
Autoritetet romake presin 6,5 milionë euro të ardhura shtesë vjetore nga tarifa 2 euro te Shatërrvani i Trevi.
Tarifa zbatohet:
- Të hënën dhe të premten: 11:30-22:00
- Ditët e tjera: 9:00-22:00
Hyrja falas pas perëndimit të diellit.
Biletat blihen përmes aplikacioneve online, faqes së internetit dhe hoteleve.
Piloti i 2024-ës përdori vija dhe shtigje hyrjeje/daljeje, me rezultate pozitive.
Ideja u propozua në 2024 për turizëm të qëndrueshëm.