Ish-ylli i Barcelonës dhe Milanit, Ronaldinho, ka vendosur të rikthehet në futbollin e klubeve pas më shumë se një dekade nga tërheqja e tij profesionale në vitin 2015. Lajmi është konfirmuar përmes nënshkrimit të një marrëveshjeje me klubin italian Ravenna, që garon në Serie C.
Prezantimi zyrtar i lojtarit do të zhvillohet më 23 qershor në Miami, ku do të zbulohen edhe fanellat e reja të skuadrës për sezonin e ardhshëm. Gjatë këtij eventi, klubi dhe familja Cipriani do të organizojnë nisma bamirësie në mbështetje të organizatës Street Soccer USA, e cila fokusohet në edukimin dhe zhvillimin social të të rinjve në vështirësi.
Për këtë afrim ka folur edhe pronari i klubit, Ignazio Cipriani, i cili e ka cilësuar Ronaldinhon si idhullin e tij të fëmijërisë dhe një figurë me ndikim të gjerë në futboll. Sipas planit të klubit, lojtari do t'i bashkohet ekipit në fazën përgatitore dhe do të jetë në dispozicion të stafit teknik. Megjithatë, nuk është konfirmuar ende nëse braziliani do të zbresë rregullisht në fushë si lojtar aktiv për ndeshjet e kampionatit.
Ravenna synon që përmes këtij investimi të rrisë vëmendjen ndaj projektit të saj sportiv. Në të kaluarën, ky klub ka pasur në radhët e saj emra të njohur të futbollit si Christian Vieri, Fabio Cannavaro, Alberto Gilardino dhe Vincenzo Montella.
Përditësime
Legjenda e futbollit Ronaldinho ka zyrtarizuar blerjen e aksioneve të klubit italian Ravenna FC. Si objektiv strategjik, klubi ka përcaktuar ngjitjen në Serie B. Ronaldinho deklaroi se ky investim buron nga lidhja e tij e ngushtë me familjen Cipriani dhe nga ambicia për ta rikthyer skuadrën në futbollin profesionist.