Rowingu është përzgjedhur si një nga sportet që do të përfaqësojnë Kosovën në kuadër të Lojërave Mesdhetare Prishtina 2030. Institucionet shtetërore kanë nisur koordinimin për zhvillimin e kësaj disipline në vend, duke mbështetur formimin dhe organizimin e klubeve të reja.
Ministri në detyrë i Rinisë dhe Sportit, Blerim Gashani, zhvilloi një takim me drejtuesit e Federatës së Rowingut dhe përfaqësues të klubeve nga Prizreni, Prishtina dhe Deçani. Në qendër të bisedimeve ishin sfidat teknike, nevojat për infrastrukturë dhe hapat e domosdoshëm për forcimin e këtij sporti në nivel kombëtar.
Sipas ministrit Gashani, Federata e Rowingut ndodhet në fazën e licencimit, ndërsa synimi mbetet sigurimi i një përfaqësimi dinjitoz të Kosovës si organizatore. Ky sport është përfshirë si sport bazë në fazën e parë të Programit Sportiv për Lojërat Mesdhetare 2030, duke u konsideruar si një mundësi për të nxitur pjesëmarrjen e të rinjve dhe për të sjellë një kulturë të re sportive në vend.
Projekti synon të krijojë baza të qëndrueshme për zhvillimin afatgjatë të rowingut, duke e promovuar atë si një disiplinë kyçe për vitet në vijim.