Aksi rrugor Qukës–Qafë Plloçë u bllokua rreth orës 02:00 të datës 8 shkurt 2026, si pasojë e rrëshqitjes së dherave dhe rënies së masiveve të gurëve në trupin e rrugës.
Sipas informacioneve paraprake, punimet jashtë standarteve dhe reshjet e fundit kanë destabilizuar terrenin në këtë segment, i cili prej kohësh mbetet zonë problematike për qarkullimin. Qarkullimi i mjeteve është ndërprerë plotësisht.
Drejtuesit e automjeteve këshillohen të shmangin këtë aks dhe të përdorin rrugë alternative deri në njoftimin e radhës. Pritet ndërhyrja e strukturave përkatëse për pastrimin e rrugës dhe rikthimin e normalitetit.
Situata po monitorohet për shkak të rrezikut nga rrëshqitje të tjera. Policia rrugore u bën apel drejtuesve të mjeteve të tregojnë kujdes të shtuar, sidomos gjatë natës dhe në kushte të pafavorshme atmosferike.
Ky segment rrugor, i cilësuar si "rruga e florinjtë" me vlerë të paktën 260 milionë euro, u ndërtua nga dikasteri i drejtuar nga ish-zv.kryeministrja dhe ministrja Belinda Balluku. Ajo ka masë sigurie pezullim nga detyra nga GJKKO dhe SPAK, masë që mbeti në fuqi pas vendimit të Gjykatës Kushtetuese të premten.
Përditësime
Rruga Qukës–Qafë Plloçë u rihap pjesërisht pas punimeve gjatë natës. Një karreks është i hapur dhe qarkullimi vijon.
- Kilometri i parë i lotit të tretë ka tokë të paqëndrueshme me çarje dhe lëvizje toke në pjesën e sipërme.
- Autoritetet parashikojnë probleme nga reshjet e ardhshme.